Joriy yildan Ichki ishlar vazirligi akademiyasida dual ta’lim joriy qilindi. Yangi tizim nazariya va amaliyot uyg‘unligini kuchaytirish asnosida ta’lim sifatini ham oshirmoqda.
Akademiya boshlig‘i dual ta’lim bo‘yicha amalga oshirilayotgan ishlar va kursantlarning amaliy mashg‘uloti bilan tanishish maqsadida Mirzo Ulug‘bek, Yunusobod hamda Chilonzor tumanlari ichki ishlar organlari faoliyatini muvofiqlashtirish boshqarmalarida bo‘ldi.
Aytish joizki, hozirda kunduzgi ta’lim bakalavriatining 2-bosqich kursantlari dual asosida ta’lim olishmoqda. Bunda haftaning 4 kuni akademiya bazasida nazariy darslar, qolgan 3 kun poytaxtimiz tumanlaridagi ichki ishlar organlarida amaliy mashg‘ulotlar tashkil qilinmoqda. Kursantlar tajribali murabbiylari qo‘l ostida xodim yordamchisi lavozimida zarur kasbiy ko‘nikmalarni egallashmoqda.
Sayyor uchrashuvlar chog‘ida akademiya boshlig‘i joylardagi mas’ullar, murabbiylikka biriktirilgan amaliyot xodimlari va kursantlar bilan muloqot qildi. Dual ta’limning maqsadi, muhim jihatlari, tizim uchun yuqori malakali kadrlar tayyorlash maqsadida amalga oshilayotgan keng qamrovli ishlar, ayni paytda yosh kadrlar bilan bog‘liq muammolarga atroflicha to‘xtaldi.
“Ta’limni isloh etib borish davr talabiga aylanmoqda. Muhtaram Prezidentimiz dual ta’limni keng joriy qilish masalasiga to‘xtalib, o‘quv dasturini bugungi xavf-xatarlarga moslashtirib borish zarurligini ta’kidlagan edilar. Shu ma’noda, kursantlarimiz dual ta’lim imkoniyatlaridan foydalanib, kelgusi xizmat faoliyatlariga hozirdanoq moslashib borishlari kerak”, - dedi Rustam Xatamov.
Muloqot davomida kursantlar bilan maqsadli ishlash, mashg‘ulotlarni samarali tashkil etish, amaliyy ko‘nikmalarni yuksaltirish, xizmat intizomiga qat’iy rioya qilish yuzasidan mas’ullarga ko‘rsatmalar berildi.
Shu kuni akademiya boshlig‘i hududiy ichki ishlar organlarini metodik ta’minlash borasidagi vazifalar ijrosi bilan ham tanishdi. Mas’ullar bilan muloqot chog‘ida hududlarning kriminogen vaziyatiga salbiy ta’sir ko‘rsatayotgan har bir omilni aniqlash va muammolarni bartaraf etish yuzasidan aniq vazifalar berildi. Ilmiy-amaliy o‘rganishlar kutilgan natija berishi, ishlab chiqilayotgan taklif va tavsiyalar amaliyot uchun foydali bo‘lishi, eng muhimi, huquqbuzarliklarning barvaqt oldini olish va jinoyatchilikni jilovlashga xizmat qilishi kerakligi ta’kidlandi.
IIV akademiyasi Axborot xizmati
