Жорий йилдан Ички ишлар вазирлиги академиясида дуал таълим жорий қилинди. Янги тизим назария ва амалиёт уйғунлигини кучайтириш асносида таълим сифатини ҳам оширмоқда.
Академия бошлиғи дуал таълим бўйича амалга оширилаётган ишлар ва курсантларнинг амалий машғулоти билан танишиш мақсадида Мирзо Улуғбек, Юнусобод ҳамда Чилонзор туманлари ички ишлар органлари фаолиятини мувофиқлаштириш бошқармаларида бўлди.
Айтиш жоизки, ҳозирда кундузги таълим бакалавриатининг 2-босқич курсантлари дуал асосида таълим олишмоқда. Бунда ҳафтанинг 4 куни академия базасида назарий дарслар, қолган 3 кун пойтахтимиз туманларидаги ички ишлар органларида амалий машғулотлар ташкил қилинмоқда. Курсантлар тажрибали мураббийлари қўл остида ходим ёрдамчиси лавозимида зарур касбий кўникмаларни эгаллашмоқда.
Сайёр учрашувлар чоғида академия бошлиғи жойлардаги масъуллар, мураббийликка бириктирилган амалиёт ходимлари ва курсантлар билан мулоқот қилди. Дуал таълимнинг мақсади, муҳим жиҳатлари, тизим учун юқори малакали кадрлар тайёрлаш мақсадида амалга ошилаётган кенг қамровли ишлар, айни пайтда ёш кадрлар билан боғлиқ муаммоларга атрофлича тўхталди.
“Таълимни ислоҳ этиб бориш давр талабига айланмоқда. Муҳтарам Президентимиз дуал таълимни кенг жорий қилиш масаласига тўхталиб, ўқув дастурини бугунги хавф-хатарларга мослаштириб бориш зарурлигини таъкидлаган эдилар. Шу маънода, курсантларимиз дуал таълим имкониятларидан фойдаланиб, келгуси хизмат фаолиятларига ҳозирданоқ мослашиб боришлари керак”, - деди Рустам Хатамов.
Мулоқот давомида курсантлар билан мақсадли ишлаш, машғулотларни самарали ташкил этиш, амалийй кўникмаларни юксалтириш, хизмат интизомига қатъий риоя қилиш юзасидан масъулларга кўрсатмалар берилди.
Шу куни академия бошлиғи ҳудудий ички ишлар органларини методик таъминлаш борасидаги вазифалар ижроси билан ҳам танишди. Масъуллар билан мулоқот чоғида ҳудудларнинг криминоген вазиятига салбий таъсир кўрсатаётган ҳар бир омилни аниқлаш ва муаммоларни бартараф этиш юзасидан аниқ вазифалар берилди. Илмий-амалий ўрганишлар кутилган натижа бериши, ишлаб чиқилаётган таклиф ва тавсиялар амалиёт учун фойдали бўлиши, энг муҳими, ҳуқуқбузарликларнинг барвақт олдини олиш ва жиноятчиликни жиловлашга хизмат қилиши кераклиги таъкидланди.
ИИВ академияси Ахборот хизмати
