Давлат тили – жамият устуни
Она тили – миллий ўзлигимиз тимсоли. Тил – миллат ва Ватан тушунчалари каби муқаддас саналади. Зеро, она тилисиз жамият тараққиётга эришолмайди.
Ўзбек тили байрами муносабати билан Ички ишлар вазирлиги академиясида “Давлат тили ва маънавият – жамиятнинг икки устуни” мавзуида маънавий-маърифий бўлиб ўтди. Унда таниқли олим ва адабиётшунослар, илмий тадқиқотчилар, курсант ёшлар ҳамда ИИВ академик лицейлари ва ихтисослаштирилган мактаб-интернати ўқувчилари иштирок этди.
– Ҳар бир миллат ўз она тили билан тирикдир. Тарихдан биламизки, ғоят мураккаб шароитда – 1989 йилнинг 21 октябрида “Давлат тили ҳақида”ги қонун қабул қилинган эди. Мустақилликка эришганимиздан сўнг она тилимиз том маънодаги давлат тилига айланиб, халқимизни буюк марраларга сафарбар этадиган беқиёс куч сифатида майдонга чиқди. Айниқса сўнгги беш йилда она тилимизни ривожлантириш, унинг давлат тили сифатидаги мақоми ва мавқеини юксалтириш, ёш авлодни она тилига ҳурмат руҳида тарбиялаш масалаларига катта эътибор қаратилмоқда, – деди таълим маскани раҳбари, полковник Рустам Хатамов.
Тилшунос олимларнинг эътироф этишича, Ўзбек тили байрами халқимиз маънавий ҳаётидан тобора мустаҳкам ўрин эгаллаб бормоқда. Ҳозирги кунда мамлакатимизда яшаётган турли миллат ва элат вакиллари ўзбек тилини ўрганишга катта қизиқиш ва истак билдираётганлари аҳамиятга молик. Айниқса, хорижий мамлакатларда ўзбек тилини ўрганишга иштиёқ тобора кучаймоқда. Бугун AҚШ, Буюк Британия, Германия, Россия, Хитой, Ҳиндистон, Туркия ва шу каби бир қатор давлатларнинг 60 га яқин университетлари ва 100 дан зиёд мактабларида ўзбек тили ўргатилади. Жаҳонда 50 миллиондан ошиқ кишининг ўзбек тилида сўзлашиши асрлар қаъридан ўтиб келаётган она тилимизнинг нуфузидан ёрқин нишона беради.
– Муҳтарам Президентимиз “Янги Ўзбекистонни, янги Ренессанс пойдеворини барпо этишдек эзгу мақсадларимизга эришишда, ҳеч шубҳасиз, она тилимизнинг ҳаётбахш қудратига таянамиз”, дея бежиз таъкидламадилар. Чунки ўзлигини таниган ҳар бир миллат она тили ва адабиётини асраб-авайлайди, унинг ривожи йўлида бор куч-салоҳиятини сафарбар этади. Бугун ички ишлар органларида ҳам давлат тилининг нуфузи ва мавқеини ошириш йўлида кенг кўламли ишлар амалга оширилмоқда. Бу давлат тилида иш юритишни самарали ташкил қилиш ва қонун ҳужжатларига сўзсиз риоя этилишини таъминлашга хизмат қилмоқда, – деди Ички ишлар вазирининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси, подполковник Хуршидбек Рўзиев.
Тадбирда Вазирлар Маҳкамасининг Маънавият ва давлат тилини ривожлантириш масалалари департаменти мудири Абдуғаффор Қирғизбоев, Республика Маънавият ва маърифат маркази раҳбарининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси, шоира Муҳтарама Улуғова, Ўзбекистон ёзувчилар уюшмаси аъзоси Асрор Мўмин ва бошқалар сўз олиб, мустақил давлатчилигимиз тимсоли бўлган бебаҳо маънавий бойлигимизни асраб-авайлаш ва келгуси авлодларга етказиш, она тилимизнинг мавқеини янада ошириш, бу борада ўзбек тилшунослигида эришилаётган ютуқлар ва истиқболдаги муҳим вазифалар ҳақида тўхталиб ўтди.
Тадбир давомида иқтидорли курсантлар томонидан она тилимизни мадҳ этувчи шеърий парчалар ёд айтилди. Ўзбекистон Кинематография агентлиги буюртмаси асосида “Media Illusion” студияси ва ИИВ Академияси ҳамкорлигида суратга олинган “Чўлпон. Қуш эсдалиги” ҳужжатли фильми, китоб ярмаркаси каби тадбирлар барчада илиқ таассурот қолдирди.
Жамшид ХОЛОВ,
капитан.