IIV akademiyasida O‘zbekiston aralash jang san’atlari assotsiatsiyasi vakillari va nomdor sportchilar ishtirokida uchrashuv bo‘lib o‘tdi.

Keyingi yillari yurtimizda aralash jang san’ati ancha ommalashib bormoqda. Ushbu sport turi bilan shug‘ullanayotgan yoshlar safi kengayib, Vatanimiz sha’nini munosib himoya qilayotgan iqtidorlar yetishib chiqmoqda.

Tadbirda assotsiatsiya raisi o‘rinbosari Shuhrat Anvarov, bosh kotib Hojiakbar Hakimov so‘z olib, aralash jang san’atining jahon miqyosda yuksalib borayotgan nufuzini e’tirof etib, yangi klub akademiya yoshlari orasidan mahoratli sportchilarni saralash va xalqaro darajadagi musobaqalarga tayyorlashda muhim ahamiyat kasb etishini alohida ta’kidlab o‘tdilar.

Uchrashuvda klub faoliyati, jamoani shakllantirish uchun olib borilayotgan seleksiya ishlari, yoshlarni kelgusi musobaqalarga tayyorlash, ta’lim muassasasida ushbu sport turini yanada ommalashtirish xususida fikr almashildi. Sport ustalari so‘z olib, aralash jang san’atining o‘ziga xos xususiyatlari, kasbiy mahorat va jangovar-jismoniy tayyorgarlikni oshirishdagi ahamiyatiga to‘xtalishdi.

Shu kuni mehmonlar sport majmuasida aralash jang san’ati bilan shug‘ullanayotgan kursantlar uchun yaratilgan sharoitlar bilan tanishib, mahorat mashg‘ulotlari o‘tkazdilar. Yoshlarga zarur tavsiyalar berib, jamoaning kelgusi faoliyatiga muvaffaqiyat tiladilar.

IIV akademiyasi Axborot xizmati