ИИВ академиясида Ўзбекистон аралаш жанг санъатлари ассоциацияси вакиллари ва номдор спортчилар иштирокида учрашув бўлиб ўтди.

Кейинги йиллари юртимизда аралаш жанг санъати анча оммалашиб бормоқда. Ушбу спорт тури билан шуғулланаётган ёшлар сафи кенгайиб, Ватанимиз шаънини муносиб ҳимоя қилаётган иқтидорлар етишиб чиқмоқда.

Тадбирда ассоциация раиси ўринбосари Шуҳрат Анваров, бош котиб Ҳожиакбар Ҳакимов сўз олиб, аралаш жанг санъатининг жаҳон миқёсда юксалиб бораётган нуфузини эътироф этиб, янги клуб академия ёшлари орасидан маҳоратли спортчиларни саралаш ва халқаро даражадаги мусобақаларга тайёрлашда муҳим аҳамият касб этишини алоҳида таъкидлаб ўтдилар.

Учрашувда клуб фаолияти, жамоани шакллантириш учун олиб борилаётган селекция ишлари, ёшларни келгуси мусобақаларга тайёрлаш, таълим муассасасида ушбу спорт турини янада оммалаштириш хусусида фикр алмашилди. Спорт усталари сўз олиб, аралаш жанг санъатининг ўзига хос хусусиятлари, касбий маҳорат ва жанговар-жисмоний тайёргарликни оширишдаги аҳамиятига тўхталишди.

Шу куни меҳмонлар спорт мажмуасида аралаш жанг санъати билан шуғулланаётган курсантлар учун яратилган шароитлар билан танишиб, маҳорат машғулотлари ўтказдилар. Ёшларга зарур тавсиялар бериб, жамоанинг келгуси фаолиятига муваффақият тиладилар.

ИИВ академияси Ахборот хизмати