Ўз Ру En
×

МУРОЖААТЛАР МАХСУС КОМИССИЯ ТОМОНИДАН КЎРИБ ЧИҚИЛМОҚДА

Жорий йил Ички ишлар вазирлиги академиясининг кундузги таълим шаклига 2 мингдан зиёд абитуриент ҳужжат топширди. Номзодлар таркибида ИИВ академик лицейлари билан бирга, ҳарбий академик лицейлар битирувчилари, ички ишлар органлари ходимлари ҳамда профилактика инспекторлари ёрдамчилари бор.

“Абитуриент – 2020” мавсумий тадбири 20 июндан 5 июлга қадар уюшқоқлик билан ташкил этилди. Ўқишга кириш истагидаги номзодлар дастлаб махсус касбий танловда иштирок этиб, босқичма-босқич тарзда тиббий кўрик, психофизиологик ўрганиш, ёзма иш (баён), умумжисмоний тайёргарлик, чет тиллари бўйича тест синовини топширдилар. Жараённинг холис ва шаффоф ўтишини таъминлаш мақсади синовлар онлайн вақт режимида видеотасвирга туширилди. Махсус касбий танловнинг ҳар бир босқичи якунида номзодлар тўплаган баллари билан таништириб борилди. Шунингдек, натижалар Академиянинг расмий веб-сайти (akadmvd.uz)га жойлаштирилди. Қўлга киритган натижасидан кўнгли тўлмаган номзодларнинг мурожаатлари апелляция тартибида ўз вақтида кўриб чиқилди.

Кейинги босқичда махсус касбий танловдан етарли балл тўплай олган абитуриентлар якка тартибдаги якуний суҳбатда иштирок этдилар. Бунда махсус комиссия томонидан номзоднинг ҳар бир саволга аниқ, изчил ва мантиқий кетма-кетликда жавоб бериши холисона баҳоланди. Абитуриентлар якка тартибдаги суҳбатдан сўнг тўплаган балларини билиб олиш имконига эга бўлдилар. Ниҳоят, жорий йилнинг 9 июль куни “Абитуриент – 2020” тадбирининг умумий натижалари эълон қилинди. Пандемия шароити туфайли умумий баллар Академиянинг расмий веб-сайти (akadmvd.uz)да ҳавола этилганини алоҳида эътироф этиш жоиз.

Айни кунларда якка тартибдаги якуний суҳбат натижалари бўйича келган номзодларнинг мурожаатлари кўриб чиқилмоқда. Махсус комиссия аъзолари ҳар бир мурожаатни белгиланган талаблар доирасида ўрганиб, номзодлар ёки уларнинг яқинлари билан тушунтириш ишлари олиб боришмоқда. Абитуриентнинг якка тартибдаги суҳбат жараёни акс этган видеотасвирлар мутахассислар томонидан таҳлил қилиниб, қўйилган баллар асослантириб бериляпти.

 

ИИВ Академияси матбуот хизмати        

Белгиланган матнни тинглаш учун қуйидаги тугмани босинг Powered by GSpeech