Yoshlar kuni munosabati bilan IIV akademiyasida “Rahbar va yoshlar” uchrashuvi bo‘lib o‘tdi.
Ichki ishlar vazirligi departament boshlig‘i o‘rinbosari, Ma’naviy-ma’rifiy ishlar xizmati rahbari Sohibjamol Joldasova va uning xotin-qizlar masalalari bo‘yicha o‘rinbosari Nargiza Mirjalolova akademiyada faoliyat yuritayotgan ayol xodimalar va ta’lim olayotgan kursant qizlar bilan uchrashdi.
Uchrashuvda yurtimiz xotin-qizlari uchun yaratilayotgan keng imkoniyatlar e’tirof etildi. Yangi O‘zbekistonda xotin-qizlarning o‘rni va nufuzi tobora yuksalib borayotgani, buning samarasida ayollar barcha sohalar qatori ichki ishlar organlari tizimida ham samarali mehnat qilayotgani aytib o‘tildi.
“Ayollarimizni har tomonlama qo‘llab-quvvatlash, iqtidor va salohiyatini ro‘yobga chiqarish, ayniqsa kursant qizlarimizni bilimli, fidoyi, vatanparvar insonlar etib tarbiyalash ustuvor vazifalarimiz sanaladi. Prezidentimiz bitta qizni o‘qitsak, butun oilani o‘qitgan bo‘lamiz, deya bejiz aytmaganlar”, - dedi Sohibjamol Joldasova.
Ochiq va samimiy muloqot ruhida o‘tgan tadbirda vazirlik mas’ul xodimi yig‘ilganlarning taklif va muammolarini tingladi. Yoshlar qatlami mamlakatimiz taraqqiyotining muhim tayanchi ekanligini ta’kidlab, xotin-qizlarni har tomonlama faol bo‘lishga, zamonaviy sharoit va imkoniyatlardan unumli foydalanishga, mamlakatimiz ravnaqiga munosib hissa qo‘shishga chorladi.
Tadbirda so‘z chiqqanlar tomonidan bildirilgan har bir murojaat va tashabbus qo‘llab-quvvatlandi. Kursant qizlar o‘zlarini qiziqtirgan masalalar yuzasidan maslahat va tavsiyalar oldi. Bir guruh faollar vazirlik rahbariyatining tashakkurnoma va esdalik sovg‘alari bilan rag‘banlantirildi.
IIV akademiyasi Axborot xizmati
