Oçiqlik, tezkorlik va xolislik
Öz Ўзб Рус En

Yangiliklar

Til yaşasa, millat yaşaydi

17 Oktyabr 2026, 16:31

837

21-oktyabr – Özbek tili bayrami kuni munosabati bilan Içki işlar vazirligi akademiyasida ötkazilgan ilmiy-amaliy konferensiya şu mavzuga bağişlandi.

Tilşunos olimlar, mutaxassislar, professor-öqituvçilar, yoş tadqiqotçilar, talaba va kursant yoşlar iştirokida ötgan anjumanda ona tilimiz nufuzini yanada yuksaltiriş, uning boy imkoniyatlaridan samarali foydalaniş, davlat va jamiyat hayotida adabiy til me’yorlariga rioya qiliş, milliy madaniy merosimizni asraş va kelgusi avlodlarga yetkaziş masalalariga alohida e’tibor qaratildi.

Ta’kidlanganidek, özbek tili milliy özligimiz va mustaqil davlatçilik timsoli, bebaho ma’naviy boylikdir. Keyingi yillarda ona tilimizning qadrini uluğlaş, jahon miqyosidagi nufuzini oşiriş, davlat tili sifatida mavqeini mustahkamlaş yölida keng qamrovli işlar amalga oşirildi. Muhtaram Prezidentimizning farmoni asosida mamlakatimizda Özbek tili bayrami kuni belgilanib, milliy qadriyatlarimizni asrab-avaylaşga bölgan e’tibor yanada kuçaydi.

Konferensiyada yetakçi oliy ta’lim va ilmiy-tadqiqot muassasalari vakillari, olimlar sözga çiqdi. “Özbek tilini xorijiy til sifatida öqitişning zamonaviy metodlari va raqamli texnologiyalar”, “Nutq madaniyati sohaviy kommunikatsiyaning sifat körsatkiçi sifatida”, “Özbek xalq maqollarining badiiy diskursdagi köpma’noliligi va ularni luğatlarga kiritiş muammosi”, “Davlat tilining nufuzini oşirişda zamonaviy axborot texnologiyalarining örni” va boşqa mavzularda ma’ruzalar tinglandi.

Özbek tilini öqitişning innovatsion yondaşuvlarini ommalaştiriş, davlat idoralarida ona tili me’yorlariga rioya qiliş va iş yuritişni yanada takomillaştiriş, özbek tilining raqamli imkoniyatlarini kengaytiriş, yoşlarning nutq madaniyatini yuksaltiriş, tilşunoslik faoliyatini rivojlantiriş borasida dolzarb taklif hamda mulohazalar bildirildi.

IIV akademiyasi Axborot xizmati

Çop etiş
Нажмите на кнопку ниже, чтобы прослушать текст Powered by GSpeech