O‘zbekiston Kasaba uyushmalari federatsiyasi tashabbusi bilan 5–6-noyabr kunlari Jamoat xavfsizligi universitetida kursantlar spartakiadasi tashkil etildi.
Musobaqada poytaxtimizdagi harbiy va harbiylashtirilgan oliy ta’lim muassasalari kursantlari sportning suzish, minifutbol, stol tennisi, voleybol va shaxmat turlaridan o‘zaro bellashdilar.
Ikki kun davom etgan bahslar yakunida natijalar quyidagicha bo‘ldi: minifutbol bo‘yicha IIV akademiyasi birinchi, Qurolli Kuchlar akademiyasi ikkinchi, Favqulodda vaziyatlar vazirligi akademiyasi uchinchi o‘rinni egalladi.
Stol tennisida faxrli o‘rinlar Bojxona instituti, IIV akademiyasi va Jamoat xavfsizligi universiteti kursantlariga nasib qildi. Suzish bahslari esa IIV akademiyasi, Davlat xavfsizlik xizmati akademiyasi hamda Jamoat xavfsizligi universiteti vakillari sovrindorlar qatoridan joy olishdi.
Shaxmat musobaqasida g‘oliblik Bojxona instituti, IIV akademiyasi va Davlat xavfsizlik xizmati akademiyasi kursantlariga nasib qilgan bo‘lsa, voleybol bo‘yicha Qurolli Kuchlar akademiyasi jamoasi birinchi, Jamoat xavfsizligi universiteti jamoasi ikkinchi, IIV akademiyasi jamoasi uchinchi o‘rin sohibi bo‘ldi.
Shuningdek, spartakiadaning qizlar o‘rtasida kechgan o‘yinlari ham qiziqarli kurashlarga boy o‘tdi. Voleybol va stol tennisi bellashuvlarida IIV akademiyasi, Jamoat xavfsizligi universiteti, Bojxona instituti jamoalari mos ravishda shohsupaga ko‘tarilgan bo‘lsa, shaxmatda Bojxona instituti vakili birinchi, IIV akademiyasi vakili ikkinchi hamda Jamoat xavfsizligi universiteti vakili uchinchi o‘rinni band etdi.
Musobaqa so‘nggida g‘olib va sovrindorlar Kasaba uyushmalari federatsiyasi tomonidan kubok, medal, diplom hamda qimmatbaho sovg‘alar bilan taqdirlandi.
IIV akademiyasi Axborot xizmati
