Ўзбекистон Касаба уюшмалари федерацияси ташаббуси билан 5–6 ноябрь кунлари Жамоат хавфсизлиги университетида курсантлар спартакиадаси ташкил этилди.

Мусобақада пойтахтимиздаги ҳарбий ва ҳарбийлаштирилган олий таълим муассасалари курсантлари спортнинг сузиш, минифутбол, стол тенниси, волейбол ва шахмат турларидан ўзаро беллашдилар.

Икки кун давом этган баҳслар якунида натижалар қуйидагича бўлди: минифутбол бўйича ИИВ академияси биринчи, Қуролли Кучлар академияси иккинчи, Фавқулодда вазиятлар вазирлиги академияси учинчи ўринни эгаллади.

Стол теннисида фахрли ўринлар Божхона институти, ИИВ академияси ва Жамоат хавфсизлиги университети курсантларига насиб қилди. Сузиш баҳслари эса ИИВ академияси, Давлат хавфсизлик хизмати академияси ҳамда Жамоат хавфсизлиги университети вакиллари совриндорлар қаторидан жой олишди.

Шахмат мусобақасида ғолиблик Божхона институти, ИИВ академияси ва Давлат хавфсизлик хизмати академияси курсантларига насиб қилган бўлса, волейбол бўйича Қуролли Кучлар академияси жамоаси биринчи, Жамоат хавфсизлиги университети жамоаси иккинчи, ИИВ академияси жамоаси учинчи ўрин соҳиби бўлди.

Шунингдек, спартакиаданинг қизлар ўртасида кечган ўйинлари ҳам қизиқарли курашларга бой ўтди. Волейбол ва стол тенниси беллашувларида ИИВ академияси, Жамоат хавфсизлиги университети, Божхона институти жамоалари мос равишда шоҳсупага кўтарилган бўлса, шахматда Божхона институти вакили биринчи, ИИВ академияси вакили иккинчи ҳамда Жамоат хавфсизлиги университети вакили учинчи ўринни банд этди.

Мусобақа сўнггида ғолиб ва совриндорлар Касаба уюшмалари федерацияси томонидан кубок, медал, диплом ҳамда қимматбаҳо совғалар билан тақдирланди.

ИИВ академияси Ахборот хизмати