Халқаро коррупцияга қарши курашиш куни муносабати билан ИИВ академиясида “Очиқ эшиклар куни” ташкил этилди.

Тадбир ёшларни қонунга итоаткор руҳда тарбиялаш, уларда коррупцияга қарши мустаҳкам хулқ-атворни шакллантириш, ички ишлар органлари фаолиятида очиқликни таъминлаш, жамоатчилик назоратини кучайтириш мақсадида ўтказилди.

Шу куни Тошкент давлат юридик университети талабалари академия фаолияти билан яқиндан танишди. Меҳмонларга таълимни тўлиқ рақамлаштириш, имтиҳонлар жараёнида инсон омилини камайтириш, коррупциявий ҳолатларнинг олдини олиш, курсант ва тингловчиларда ушбу иллатга қарши муросасиз муносабатни шакллантириш, тизим учун қонун устуворлигига сўзсиз риоя қиладиган халқпарвар ички ишлар органларини тайёрлаш борасида амалга оширилаётган изчил чора-тадбирлар ҳақида маълумот берилди.

Талабалар ахборот-ресурс маркази, ўқув хоналари, аудиториялар ва бошқа масканларда бўлиб, яратилган шароитларни кўздан кечирдилар. Айниқса “Ватанпарварлик” ва “Коррупцияга қарши курашиш бурчак”лари ёшларда катта қизиқиш уйғотди.

Тадбир таълим муассасалари ўртасидаги алоқаларни мустаҳкамлаш, илғор тажрибалар юзасидан ўзаро фикр алмашиш, ёшларнинг коррупцияга қарши биргаликда курашиш истагини оширишга хизмат қилди.

Жамшид Холов,

ИИВ академияси Ахборот хизмати