IIV akademiyasining bir guruh magistrlari Turkiya huquqni muhofaza qiluvchi tuzilmalari faoliyati bilan tanishdi.

Ilg‘or xorijiy tajribalarni o‘rganish maqsadida tashkil qilingan safar davomida tinglovchilar Turkiya IIV Jandarmeriya bosh qo‘mondonligi va uning tasarrufidagi tuzilmalar, jumladan, Ekspert-kriminalistika boshqarmasi, Jamoat tartibini saqlash boshqarmasi, Yagona boshqaruv markazi, Sohilbo‘yi patrullik boshqarmasi, shuningdek, Maxsus jamoat tartibini saqlash hamda Aviatsiya qo‘mondonliklarida bo‘ldilar.

Tanishuv davomida vakillarimizga mazkur tuzilmalarning vazifasi, faoliyat yo‘nalishlari, amaliyotda qo‘llanilayotgan maxsus texnikalar va ularning imkoniyatlari, tizimni raqamlashtirish borasida amalga oshirilgan ishlar, ilg‘or yondashuvlar natijasida jamoat xavfsizligini ta’minlash, turli tahdid va xatarlarning oldini olish, jinoyatchilikka qarshi kurashish, kuch va vositalarni boshqarishda erishilayotgan yutuqlar ko‘rgazmali tarzda namoyish qilindi.

Bundan tashqari, tinglovchilar jandarmeriya xodimlarining keng qamrovli faoliyati, shaxsiy tarkib uchun yaratilgan shart-sharoitlarni ko‘zdan kechirib, o‘zlarini qiziqtirgan savollar yuzasidan mutaxassislar bilan muloqot qildilar. Anqara va Istanbul shahrining tarixiy joylariga sayohat mamlakat tarixi haqida keng tasavvurga ega bo‘lish imkonini berdi.

IIV akademiyasi Axborot xizmati