ИИВ академиясининг бир гуруҳ магистрлари Туркия ҳуқуқни муҳофаза қилувчи тузилмалари фаолияти билан танишди.

Илғор хорижий тажрибаларни ўрганиш мақсадида ташкил қилинган сафар давомида тингловчилар Туркия ИИВ Жандармерия бош қўмондонлиги ва унинг тасарруфидаги тузилмалар, жумладан, Эксперт-криминалистика бошқармаси, Жамоат тартибини сақлаш бошқармаси, Ягона бошқарув маркази, Соҳилбўйи патруллик бошқармаси, шунингдек, Махсус жамоат тартибини сақлаш ҳамда Авиация қўмондонликларида бўлдилар.

Танишув давомида вакилларимизга мазкур тузилмаларнинг вазифаси, фаолият йўналишлари, амалиётда қўлланилаётган махсус техникалар ва уларнинг имкониятлари, тизимни рақамлаштириш борасида амалга оширилган ишлар, илғор ёндашувлар натижасида жамоат хавфсизлигини таъминлаш, турли таҳдид ва хатарларнинг олдини олиш, жиноятчиликка қарши курашиш, куч ва воситаларни бошқаришда эришилаётган ютуқлар кўргазмали тарзда намойиш қилинди.

Бундан ташқари, тингловчилар жандармерия ходимларининг кенг қамровли фаолияти, шахсий таркиб учун яратилган шарт-шароитларни кўздан кечириб, ўзларини қизиқтирган саволлар юзасидан мутахассислар билан мулоқот қилишдилар. Анқара ва Истанбул шаҳрининг тарихий жойларига саёҳат мамлакат тарихи ҳақида кенг тасаввурга эга бўлиш имконини берди.

ИИВ академияси Ахборот хизмати