IIV akademiyasi boshlig‘i Rustam Xatamov kriminogen vaziyati murakkab mahallalarga biriktirilgan mas’ullar bilan videokonferensaloqa shaklida yig‘ilish o‘tkazdi.
Unda davlatimiz rahbarining mahallalarda xavfsiz muhit yaratish va huquqbuzarliklarning barvaqt oldini olish to‘g‘risidagi PQ-1-son hamda bu boradagi tizim natijadorligini oshirishga qaratilgan PQ-253-son qarori doirasida amalga oshirilayotgan chora-tadbirlar muhokama qilindi.
Yig‘ilish avvalida akademiya boshlig‘i mahallalar bilan ishlashning samarali mexanizmlari yaratilgani hududlarni manzilli o‘rganish, kriminogen vaziyatga salbiy ta’sir ko‘rsatayotgan omillarni bartaraf etishga xizmat qilayotganini ta’kidladi.
Shu kuni mahallalarda xavfsiz muhit yaratishga qaratilgan ishlar birma-bir muhokama qilindi. Qaror ijrosi yuzasidan Qoraqalpog‘iston Respublikasi, Xorazm, Buxoro, Navoiy va Toshkent viloyatlari hamda poytaxtimizning “qizil”, “sariq” toifadagi mahallalariga biriktirilgan ishchi guruhlar rahbarlarining axboroti tinglandi.
Akademiya boshlig‘i xavfsiz ko‘cha va uylarni tashkil etish, jinoyat sodir etilishi ehtimoli yuqori bo‘lgan hududlarni zamonaviy kameralar, tashvish va signalizatsiya qurilmalari bilan ta’minlash masalalariga e’tibor qaratdi. Mazkur yo‘nalishdagi ishlar mahalla osoyishtaligining muhim omili ekanligini ta’kidlab, xavfsizlik choralarini kuchaytirish, texnik va jismoniy qo‘riqlovga olishni jadallashtirish, har bir “jinoyat o‘chog‘i” bo‘yicha aniq chora-tadbirlarni belgilash yuzasidan topshiriq berdi.
Yig‘ilishda hududlarga joriy qilingan ilg‘or tajribalar bilan birga, yo‘l qo‘yilayotgan kamchiliklar ham aytib o‘tildi. Ayrim mahallalarda kriminogen vaziyatga salbiy ta’sir ko‘rsatayotgan omillar mavjudligi, ijtimoiy profilaktika ob’ektlari bilan yetarli ishlar olib borilmayotgani, huquqbuzarliklarning barvaqt oldini olish bo‘yicha korxona va tashkilotlarga yuborilayotgan taqdimnomalar nazoratsiz qolayotgani ta’kidlandi. Shundan kelib chiqib, manfaatdor idoralar va “mahalla yettiligi” bilan birgalikda yechimini kutayotgan masalalarni hal qilish, “yo‘l xarita”lar ijrosini sifatli ta’minlash, samarali ish uslublarini amaliyotga joriy qilish bo‘yicha yangi takliflarni ishlab chiqish borasida tegishli vazifalar belgilab olindi.
IIV akademiyasi Axborot xizmati
