Ichki ishlar vazirligi akademiyasi va Koreya milliy politsiya universiteti o‘rtasida hamkorlik memorandumi imzolandi.

Onlayn tarzda o‘tgan tadbir oldidan ta’lim muassasalari rahbarlari Rustam Xatamov va Oh Mun Kyo muloqot qildilar. Samimiy ruhda kechgan uchrashuvda O‘zbekiston va Janubiy Koreya o‘rtasidagi do‘stona munosabatlar e’tirof etildi.

Ta’kidlanganidek, ikki mamlakatni bog‘lab turuvchi rishtalar ko‘p. O‘zbek va koreys xalqlarining madaniyati, mentaliteti, qadriyatlari bir-biriga yaqin. O‘zaro aloqalar yuksak ishonch va hurmat tamoyillari asosiga qurilgan. O‘zbekiston ham, Janubiy Koreya ham taraqqiyotning zamonaviy yo‘lini tanlagan. Global va mintaqaviy ahamiyatga ega masalalar bo‘yicha tomonlarning yondashuvi o‘xshash.

Keyingi yillarda ikki tomonlama munosabatlar yangi davrga qadam qo‘ydi va alohida strategik sheriklik darajasiga ko‘tarildi.

Muloqot chog‘ida ta’lim, ayniqsa huquqni muhofaza qiluvchi tuzilmalar uchun yuqori malakali kadrlar tayyorlash sohasida yo‘lga qo‘yilgan hamkorlik aloqalari ham e’tirof etildi. Birgalikda amalga oshirilayotgan tadbirlar o‘zaro tajriba almashish, ilg‘or yutuqlarni o‘rganish va kadrlar salohiyatini oshirishda muhim ahamiyat kasb etayotgani ta’kidlandi.

“Koreya milliy politsiya universiteti jahondagi yetakchi oliy ta’lim muassasalaridan biri hisoblanadi. O‘quv dargohida ta’limning zamonaviy yondashuvlari yo‘lga qo‘yilgan. Universitet bilan hamkorlikni kengaytirish manfaatlarimizga birdek xizmat qiladi. Kelgusida ta’limni rivojlantirishga qaratilgan loyihalarni amalga oshirishni maqsad qilganmiz”, – dedi akademiya rahbari.

O‘z navbatida, Oh Mun Kyo ikki tomonlama munosabatlarni yuksak darajada qadrlashini, hamkorlik aloqalarini sifat va mazmun jihatdan boyitish yo‘lida muhim qadam tashlangani, eng muhimi, bu qat’iy intilish va sa’y-harakatlar natijasi ekanligini alohida qayd etdi.

Uchrashuv yakunida ta’lim muassasalari rahbarlari hamkorlik memorandumini imzoladilar.

IIV akademiyasi Axborot xizmati