Ички ишлар вазирлиги академияси ва Корея миллий полиция университети ўртасида ҳамкорлик меморандуми имзоланди.

Онлайн тарзда ўтган тадбир олдидан таълим муассасалари раҳбарлари Рустам Хатамов ва Оҳ Мун Кё мулоқот қилдилар. Самимий руҳда кечган учрашувда Ўзбекистон ва Жанубий Корея ўртасидаги дўстона муносабатлар эътироф этилди.

Таъкидланганидек, икки мамлакатни боғлаб турувчи ришталар кўп. Ўзбек ва корейс халқларининг маданияти, менталитети, қадриятлари бир-бирига яқин. Ўзаро алоқалар юксак ишонч ва ҳурмат тамойиллари асосига қурилган. Ўзбекистон ҳам, Жанубий Корея ҳам тараққиётнинг замонавий йўлини танлаган. Глобал ва минтақавий аҳамиятга эга масалалар бўйича томонларнинг ёндашуви ўхшаш.

Кейинги йилларда икки томонлама муносабатлар янги даврга қадам қўйди ва алоҳида стратегик шериклик даражасига кўтарилди.

Мулоқот чоғида таълим, айниқса ҳуқуқни муҳофаза қилувчи тузилмалар учун юқори малакали кадрлар тайёрлаш соҳасида йўлга қўйилган ҳамкорлик алоқалари ҳам эътироф этилди. Биргаликда амалга оширилаётган тадбирлар ўзаро тажриба алмашиш, илғор ютуқларни ўрганиш ва кадрлар салоҳиятини оширишда муҳим аҳамият касб этаётгани таъкидланди.

“Корея миллий полиция университети жаҳондаги етакчи олий таълим муассасаларидан бири ҳисобланади. Ўқув даргоҳида таълимнинг замонавий ёндашувлари йўлга қўйилган. Университет билан ҳамкорликни кенгайтириш манфаатларимизга бирдек хизмат қилади. Келгусида таълимни ривожлантиришга қаратилган лойиҳаларни амалга оширишни мақсад қилганмиз”, – деди академия раҳбари.

Ўз навбатида, Оҳ Мун Кё икки томонлама муносабатларни юксак даражада қадрлашини, ҳамкорлик алоқаларини сифат ва мазмун жиҳатдан бойитиш йўлида муҳим қадам ташлангани, энг муҳими, бу қатъий интилиш ва саъй-ҳаракатлар натижаси эканлигини алоҳида қайд этди.

Учрашув якунида таълим муассасалари раҳбарлари ҳамкорлик меморандумини имзоладилар.

ИИВ академияси Ахборот хизмати