IIV akademiyasida “Ichki ishlar organlarining axborot-tahlil faoliyati: bugungi holati va istiqbollari” mavzuida ilmiy-amaliy konferensiya bo‘lib o‘tdi.

Unda manfaatdor idoralar, oliy ta’lim va ilmiy-tadqiqot muassasalari, shuningdek Prezident huzuridagi Davlat boshqaruvi akademiyasi, Strategik tahlil va istiqbolni belgilash oliy maktabi, Kriminologiya tadqiqot instituti va boshqa tashkilotlar vakillari ishtirok etdi.

So‘zga chiqqanlar ichki ishlar organlarida axborot-tahlil faoliyatini takomillashtirish, tizimga zamonaviy yondashuvlarni samarali tatbiq etish, soha uchun yuqori malakali kadrlar tayyorlash, amaliyot xodimlarining kasbiy kompetensiyalarini rivojlantirish masalalariga to‘xtalib, axborot-tahlil ishini yanada yaxshilashga qaratilgan taklif va tavsiyalarini bildirdilar.

Faoliyatni tahlil qilish, mavjud muammolarning ilmiy-amaliy yechimlarini ishlab chiqish, ta’lim va amaliyot uzviyligini mustahkamlash maqsadida o‘tkazilgan konferensiya barcha ishtirokchilar, ayniqsa “tashkiliy-shtab faoliyati” yo‘nalishi kursantlari uchun dolzarb ahamiyat kasb etdi.

IIV akademiyasi Axborot xizmati