O‘zbek tiliga davlat tili maqomi berilganligining 35 yilligi munosabati bilan poytaxtimizdagi Adiblar xiyobonida milliy qadriyatlar sayli o‘tkazildi.

Adabiy-ma’rifiy tadbirda Oliy ta’lim, fan va innovatsiyalar vazirligi, Yozuvchilar uyushmasi vakillari, IIV akademiyasi kursantlari, vazirlik tasarrufidagi akademik litseylar o‘quvchilari hamda Benkov nomidagi Respublika ixtisoslashtirilgan rassomlik maktabida ta’lim olayotgan yoshlar ishtirok etdi.

Tadbirda ona tilimizning hayotimizdagi o‘rni, uni asrab-avaylash va milliy qadriyat sifatida targ‘ib qilish borasidagi ezgu ishlar, o‘zbek tilining davlat tili sifatidagi maqomi va nufuzini oshirishga qaratilgan izchil islohotlar e’tirof etildi. Yosh avlodda xalqimiz tafakkurining bebaho xazinasi bo‘lmish ona tilimizga nisbatan milliy g‘urur hissini yuksaltirish dolzarb vazifalardan biri ekanligi ta’kidlandi.

Sayilda xalqimizga xos qadriyatlar, milliy ufr-odat va an’analar, asrlar osha zavol topmay kelayotgan kuy-qo‘shiqlar, xalq og‘zaki ijodi namunalari tarannum etildi. Yoshlar “Zakovat”, shaxmat, arqon tortish va boshqa o‘yinlar atrofida birlashib, ona yurtimizni turli suratlar, she’rlar orqali madh qildilar. Buyuk ajdodlarimizning ibrati hayotini gavdalantirdilar. Adabiyotga, kitobga ixlosmand yoshlar uchun ko‘rgazma uyushtirildi.

Tadbir so‘nggida eng zukko, faol va ist’dodli yoshlarga kitoblar sovg‘a qilindi. Akademiya badiiy havaskorlik jamoalari tomonidan tayyorlagan madaniy dastur barchaga manzur bo‘ldi.

IIV akademiyasi Axborot xizmati