Ichki ishlar vazirligi akademiyasida Xitoyning Jamoat xavfsizligi universiteti talabalari uchun ikki haftalik o‘quv kursi tashkil qilindi.

O‘quv kursining ochilish marosimida akademiya boshlig‘i Rustam Xatamov ishtirok etib, ta’lim muassasalarimiz o‘rtasida hamkorlik aloqalari izchil rivojlanib borayotganini e’tirof etdi.

“Keyingi yillarda O‘zbekiston va Xitoy munosabatlari sifat jihatdan yangi bosqichga chiqdi. Muhim strategik yo‘nalishlar, shu jumladan, ta’lim sohasida ham hamkorlik ko‘lami kengaydi. Bugungi kunda akademiyamiz Xitoyning yetakchi turdosh oliy o‘quv muassasalari bilan manfaatli aloqalarni yo‘lga qo‘ygan. Galdagi o‘quv kurslari ham hamkorligimizning amaliy ifodasi sifatida o‘zaro tajriba almashinuvini yanada mustahkamlashga xizmat qiladi”, - dedi akademiya boshlig‘i.

O‘z navbatida, Jamoat xavfsizligi universiteti professori, delegatsiya rahbari Li Szin xalqlarimiz o‘rtasidagi do‘stona rishtalarni yuksak darajada qadrlashini aytib o‘tdi. Uning e’tiroficha, ikki mamlakatni ko‘p asrlik tarix, o‘xshash madaniyat va samimiy ishonch ruhi bog‘lab turadi. Bu esa hamkorlik aloqalari ulkan salohiyat va istiqbolga ega ekanligidan dalolat beradi.

Shu kunning o‘zida axborot-resurs markazida dars mashg‘ulotlari boshlab yuborildi. Ilk mashg‘ulotda talabalar o‘zbek xalqi va davlatchiligi tarixi, yurtimiz hududida qadim sivilizatsiyalarning vujudga kelishi, buyuk ajdodlarimiz va tarixiy siymolarimizning jahon ilm-fani rivojiga qo‘shgan beqiyos hissasi haqida boy ma’lumotlarga ega bo‘lishdi.

Kunning ikkinchi yarmida mehmonlar akademiya faoliyati, xususan, o‘quv binolari, innovatsion ta’lim jarayonlari, nazariy va amaliy mashg‘ulotlarni tashkil etishda qo‘llanilayotgan o‘ziga xos yondashuvlar, kursantlar uchun yaratilgan shart-sharoitlar bilan yaqindan tanishdilar. O‘quv dargohining zamonaviy qiyofasi xitoylik yoshlarda katta taassurot qoldirdi.

IIV akademiyasi Axborot xizmati