O‘zbekiston Respublikasi Qurolli Kuchlarining o‘ttiz uch yilligi hamda Vatan himoyachilari kuni munosabati bilan IIV akademiyasida tantanali tadbir bo‘lib o‘tdi.

Soha xodimlari, professor-o‘qituvchilar, faxriylar, magistratura tinglovchilari ishtirok etgan tadbirda o‘quv dargohi boshlig‘i, polkovnik Rustam Xatamov yig‘ilganlarni samimiy tabrikladi.

Bayram nutqida mamlakatimizda tinchlik, xavfsizlik va barqarorlikni ta’minlash yo‘lida amalga oshirilayotgan keng ko‘lamli islohotlar e’tirof etildi. Murakkab geosiyosiy sharoitda milliy o‘zligimizni asrash, mafkuraviy xurujlardan ogoh bo‘lish, yoshlarimizning vatanparvarlik tuyg‘ularini kuchaytirish zarurligi qayd etildi.

Akademiya boshlig‘i davlatimiz rahbarining bayram tabrigidagi ustuvor yo‘nalishlardan kelib chiqib, professor-o‘qituvchilar oldida turgan dolzarb vazifalarga e’tibor qaratdi.

– Buyuk ajdodlarimizning umr yo‘li, jasoratga to‘la hayoti yoshlarimiz uchun chinakam ibratdir. Yoshlarni vatanparvar, fidoyi shaxs etib tarbiyalash uchun ular qalbidagi yurtga muhabbat va sadoqat tuyg‘ularini yuksaltirishmiz kerak. Zero, Prezidentimiz bugungi kunda barchamiz Vatan himoyachisi bo‘lishimiz zarur, deya bejiz aytmadilar, – dedi o‘quv dargohi rahbari.

Tadbirda samarali xizmat faoliyati bilan namuna ko‘rsatayotgan bir guruh xodimlar Ichki ishlar vazirligining idoraviy mukofotlari, maxsus unvonlar hamda esdalik sovg‘alari bilan taqdirlandi.

Badiiy havaskorlik jamoalarining chiqishlari, vatan posbonlarini madh etgan kuy-qo‘shiqlari tadbirga yakun yasadi.

IIV akademiyasi Axborot xizmati