O‘qituvchi va murabbiylar kuni munosabati bilan Ichki ishlar vazirligi akademiyasi professor-o‘qituvchilari uchun bayram tadbiri o‘tkazildi.
Tadbirda muhtaram Prezidentimiz rahbarligida ta’lim sohasida amalga oshirilayotgan islohotlar, o‘qituvchi va murabbiylarning ma’naviy hayotimizdagi o‘rni, yosh avlodni barkamol voyaga yetkazish yo‘lidagi sharafli mehnatlari e’tirof etildi.
“Oramizda hech bir inson yo‘qki, ustoz ko‘rmagan, ulardan saboq va nasihat olmagan, nurli hayot yo‘liga havas qilmagan bo‘lsa. Hayotda qaysi kasbni tanlamaylik, qanday yutuqlarga erishmaylik, barchasining zamirida, eng avvalo, ustozlarimizning mashaqqatli mehnati turadi”, - dedi akademiya boshlig‘i Rustam Xatamov .
Keyingi yillarda inson qadrini ulug‘lash, o‘qituvchi va murabbiylarning jamiyatdagi qadr-qimmatini yuksaltirishga alohida e’tibor qaratilayotgani, ta’limni rivojlantirish Yangi O‘zbekistonni barpo etishning ustuvor yo‘nalishlaridan biri etib belgilangani ta’kidlandi. Bu boradagi izchil islohotlarning amaliy natijasi o‘quv dargohi faoliyatida, jamoa a’zolari erishayotgan yutuqlarda ham namoyon bo‘layotgani aytib o‘tildi.
– Davlatimiz rahbari soha vakillari bilan muloqot qilib, “yoshlarimiz ongiga “Men haqiqiy vatanparvar bo‘laman” degan g‘oyani chuqur singdirishimiz kerak”, dedilar. Ta’lim va tarbiya barchamizdan doimo hamjihatlik, faollik va fidoyilikni talab etadigan hayot-mamot masalasi ekanligi alohida ta’kidlandi. Shu ma’noda, jamoamiz oldida ham yangi maqsad va vazifalar turibdi. Ishonamanki, o‘z kasbimizga sadoqatimiz, bilim va tajribamizni ishga solib, mamlakatimizga tayanch bo‘ladigan yetuk malakali kadrlarni tayyorlashga munosib hissa qo‘shamiz, – dedi akademiya boshlig‘i.
Tadbirda yig‘ilganlar bayram bilan qizg‘in qutlandi. Ilmiy-pedagogik faoliyatida samarali natijalarga erishgan bir guruh professor-o‘qituvchilar Ichki ishlar vazirligi va akademiyaning idoraviy mukofotlari, shuningdek, turli tanlovlar nominatsiyalari bilan taqdirlandi. Akademiya badiiy havaskorlik jamoalari tomonidan tayyorlangan konsert dasturi esa barchaga bayramona kayfiyat ulashdi.
IIV akademiyasi Axborot xizmati
