Avval xabar berilganidek, IIV Akademiyasida hududiy ichki ishlar organlari xodimlari uchun qisqa muddatli o‘quv-seminar tashkil etilgan edi.

Uch kun davom etgan o‘quv-seminarda soha vakillari korrupsiyaga qarshi milliy va xalqaro huquqiy normalarning mazmun-mohiyati, korrupsiyani yuzaga keltiruvchi sabab va shart-sharoitlar, ichki ishlar organlari xodimlarida ushbu illatga nisbatan murosasiz munosabatni shakllantirish hamda “halollik vaksinasi”ni joriy etish mexanizmlari, korrupsiyaviy jinoyatlarga qarshi kurashishda ichki ishlar organlarining vakolatlari, komplayens nazoratning mazmun-mohiyati bo‘yicha zarur ko‘nikmalarga ega bo‘ldilar.

– Korrupsiya ma’lum bir sohaga emas, balki jamiyatga daxldor muammo hisoblanadi. Mamlakatimizda ulkan islohotlar amalga oshirilayotgan hozirga sharoitda korrupsiyasiz sog‘lom muhitni qaror toptirish ustuvor ahamiyat kasb etmoqda. O‘quv-seminarni tashkil etishdan qo‘zlangan maqsad ham mazkur yo‘nalishdagi izchil chora-tadbirlarning ijrosiga qaratilgan, – deydi IIV Akademiyasining Tarbiyaviy ishlarni tashkil etish va mukofotlash bo‘limi mukofotlash guruhi bosh inspektori, mayor Farhod Meliqulov.  

Mashg‘ulotlar yakunida xodimlardan sinov qabul qilinib, sertifikat berildi.

IIV Akademiyasi Axborot xizmati