Taniqli ijodkorlar Ichki ishlar vazirligi akademiyasida bo‘lib, yoshlar bilan muloqot qildilar.

“Ma’rifat ulashib” loyihasi doirasida tashkil etilgan tadbir avvalida mehmonlar axborot-resurs markazi faoliyati bilan tanishdilar. Maskanda yaratilgan zamonaviy sharoitlar, ayniqsa buyuk ajdodlarimiz nomiga atalgan sinfxonalar san’at va adabiyot vakillarida katta taassurot qoldirdi.

Kursant yoshlar bilan ijodiy uchrashuvda elimiz ardog‘idagi ijodkorlar inson ma’naviyatining yuksalishida adabiyotning o‘rni, jamiyatda kitobxonlik darajasini oshirish, ajdodlarimiz hayoti va faoliyatining ibratli jihatlariga to‘xtalib, yosh avlod vakillarini ilm-ma’rifatli bo‘lishga undadilar.

– Bugun biz Vatan uchun ko‘zlari yongan o‘g‘il-qizlarimiz bilan uchrashdik. Ularning adabiyotga, she’riyatga, san’atga bo‘lgan qiziqishini ko‘rib, rosti, quvondik. Kitob o‘qish insonga aslo ziyon qilmaydi. O‘zim ham ko‘p mutolaa qilaman, she’riyatni yaxshi ko‘raman. Bunday uchrashuvlar insonga kuchli motivatsiya, ijodiy jo‘shqinlik bag‘ishlashi bilan ahamiyatli, – deydi O‘zbekiston xalq artisti Dilorov Karimova. 

Tadbirda O‘zbekiston Yozuvchilar uyushmasi a’zolari Hulkar Hamroyeva va Iqbol Qo‘shshayeva ham o‘z mulohazalarini bildirib, yoshlarga kerakli tavsiyalar ulashdilar.

IIV akademiyasi Axborot xizmati