Volgograd Ichki ishlar vazirligi akademiyasida “Politsiya kadrlarini tayyorlash: tajriba va an’analar” mavzuiga bag‘ishlangan ilmiy-amaliy konferensiya bo‘lib o‘tdi.

Xalqaro anjumanda MDHga a’zo davlatlarning 20 dan ortiq turdosh oliy ta’lim muassasalari, shu jumladan, O‘zbekiston Respubilikasi IIV akademiyasidan vakillar, ekspert va olimlar, yosh tadqiqotchilar hamda kursantlar ishtirok etdi.

Yalpi majlis va sessiyalar ko‘rinishida davom etgan konferensiyada ichki ishlar (politsiya) organlari uchun kadrlar tayyorlashning bugungi holati, bu borada amaliyotga joriy qilingan ilg‘or yondashuv va tajribalar, innovatsion ta’limni rivojlantirish tendensiyalari atroflicha muhokama qilindi. So‘zga chiqqanlarning dolzarb mavzudagi ma’ruzalari, ilmiy asoslangan takliflari tinglandi.

Aytish joizki, konferensiya doirasida vakillarimiz Volgograd akademiyasi faoliyati bilan tanishib, ixtisoslik kafedralarida yo‘lga qo‘yilgan ilg‘or yondashuvlar, ta’lim jarayonida qo‘llanilayotgan zamonaviy texnik vosita va dasturlarni ko‘zdan kechirdilar. Bundan tashqari, mazkur ta’lim muassasasida tahsil olayotgan o‘zbekistonlik kursantlar bilan uchrashib, muloqot qildilar.

IIV akademiyasi Axborot xizmati