Shu kunlarda IIV akademiyasida ta’lim olayotgan 2-bosqich kursantlari uchun “Kichik final” kompleks o‘quv mashg‘ulotlari o‘tkazilmoqda.

Mashg‘ulotlar barcha ixtisoslik kafedralari qatori Huquqbuzarliklar profilaktikasi faoliyati kafedrasi tomonidan ham qizg‘in tarzda tashkil etilmoqda.

Kursantlar mutaxassislik yo‘nalishi bo‘yicha berilgan savol-topshiriqlarni mustaqil ravishda bajarib, ustozlaridan olgan nazariy bilimlari, bazaviy amaliyot mashg‘ulotlarida to‘plagan ko‘nikmalarini namoyon etyaptilar. Har bir jarayon hududiy ichki ishlar organlaridan jalb qilingan tajribali xodimlar hamda professor-o‘qituvchilar tomonidan tahlil qilib borilayapti.

Mirzo Ulug‘bek tumanidagi “Chimyon” MFY profilaktika katta inspektori, podpolkovnik G‘affor Abdullayevning aytishicha, bunday mashg‘ulotlar kursantlarning kasbiy mahoratini oshirib, amaliyotga tez fursatlarda moslashishini ta’minlaydi.

Yana bir kundan so‘ng “Kichik final”lar yakunlanadi. Mashg‘ulotlarda yo‘l qo‘yilgan kamchiliklar tahlil qilinib, kelgusi o‘quv jarayonlarida ularni bartaraf etish, ta’lim sifatini yanada oshirishga qaratilgan rejalar ishlab chiqiladi. Zero, maqsad ham shu – soha uchun yuqori malakali kadr tayyorlashdir!

IIV akademiyasi Axborot xizmati