Mamlakatimiz xotin-qizlarini har tomonlama qo‘llab-quvvatlash, ularning huquq va qonuniy manfaatlarini ta’minlash, jamiyat hayotining faol ishtirokchisiga aylantirish kabi maqsad va vazifalar davlat siyosatining ustuvor yo‘nalishi sanaladi.

Ichki ishlar vazirligi akademiyasida “Ayollar ma’naviyati – oila mustahkamligi poydevori” mavzuida tadbir bo‘lib o‘tdi. Unda O‘zbekiston Respbulikasi Din ishlari bo‘yicha qo‘mitasi mutaxassislari, ta’lim muassasasi professor-o‘qituvchilari va ayol xodimlar ishtirok etdi. 

Muloqot tarzida o‘tgan tadbirda xotin-qizlarning jamiyat hayotidagi o‘rni haqida fikr almashildi. So‘z olganlar yurtimizda inson qadrini yuksaltirish, ayniqsa xotin-qizlar uchun munosib sharoitlar yaratish, ularning bandligini ta’minlash, muammolarini hal qilish borasidagi ezgu ishlarni e’tirof etishdi.

Ma’rifatli ayollar yurt kelajagining mustahkam poydevor ekanligi, oila institutini mustahkamlash, gender tenglikni ta’minlash, xotin-qizlar bilan manzilli ishlash, jamiyatda oilaviy qadriyatlarni mustahkamlashga qaratilgan dasturlar ana shu maqsadda hayotga izchil tatbiq qilinayotgani aytib o‘tildi.

Tadbirda xotin-qizlarning ma’naviy-axloqiy qarashlarini yuksaltirish, huquq va manfaatlarini ta’minlash, ularni milliy o‘zligimizga yot tahdidlar va tazyiqlardan asrash masalalari xususida mulohazalar bildirilib, mutaxassislarning tavsiyalari tinglandi.

IIV Akademiyasi Axborot xizmati