Poytaxtimizdagi “Turkiston” san’at saroyida “Quvnoqlar va zukkolar” ko‘rik-tanlovining final bosqichi bo‘lib o‘tdi.

Unda tanlovning hududiy ichki ishlar organlari o‘rtasida o‘tkazilgan mintaqaviy bosqichlarida g‘oliblikni qo‘lga kiritgan 7 ta jamoa ishtirok etdi. Jamoalar “Tanishtiruv”, “Savol-javob” va “Erkin mavzu” shartlaridan o‘zaro bellashdilar. Qiziqarli sahna ko‘rinishlari, hazil-mutoyibalar, kreativ chiqishlar tomoshabinlarga katta zavq ulashdi.

Ko‘rik-tanlov yakunida hakamlar hay’ati vakillari g‘olib va sovrindorlarni e’lon qildi. Unga ko‘ra, IIV akademiyasining “Akademiya” jamoasi ko‘rik-tanlovning respublika bosqichi g‘olibi deb topildi. Jamoa a’zolariga ichki ishlar vaziri kubogi, diplom, pul mukofoti hamda qimmatbaho sovg‘alar tantanali ravishda topshirildi.

Shuningdek, Qoraqalpog‘iston Respublikasi IIVning “Orol yulduzlari” jamoasi ikkinchi, Navoiy viloyati IIBning “Matonat” jamoasi uchinchi o‘ringa loyiq ko‘rildi. Tanlovda bir guruh faol ishtirokchilar ham munosib rag‘batlantirildi.

IIV akademiyasi Axborot xizmati