Quyidagi ma’lumotlar ta’lim muassasasida o‘qish istagida bo‘lgan istiqbolli yoshlar uchun foydali bo‘lishi shubhasiz.

Akademiyaning kunduzgi ta’lim bakalavriatiga 17 yoshdan kichik va 25 yoshdan katta bo‘lmagan, umumiy o‘rta, o‘rta maxsus va professional ma’lumotga ega O‘zbekiston Respublikasi fuqarolari tanlov asosida qabul qilinadi.

Abituriyentlar dastlabki tanlov, maxsus kasbiy tanlov hamda yakka tartibdagi yakuniy suhbat bosqichlarida ishtirok etadi.

Dastlabki tanlov hududlarda o‘tkazilib, hujjatlarni to‘plash, o‘rganish va nomzodlarni tibbiy ko‘rikdan o‘tkazish tadbirlarini o‘zi ichiga oladi.

Mazkur bosqich IIV akademik litseylari bitiruvchilari va fuqarolar uchun – ularning doimiy yashash joyidagi tegishli ichki ishlar organlarida;

harbiy akademik litseylar bitiruvchilari uchun – ularning doimiy yashash joyidagi va harbiy akademik litsey joylashgan hududdagi ichki ishlar organlarida;

ichki ishlar organlari xodimlari va harbiy xizmatchilari uchun – ularning xizmat joyi va harbiy qismlarda (muassasalarda) bo‘lib o‘tadi.

Dastlabki tanlov tadbirlaridan muvaffaqiyatli o‘tgan nomzodlar maxsus kasbiy tanlovga qo‘yiladi.

Maxsus kasbiy tanlov va yakka tartibdagi yakuniy suhbat akademiyada bo‘lib o‘tadi.

Bunda umumiy yo‘nalishga hujjat topshirganlar quyidagi sinovlarni topshiradi:

yozma ish (bayon yoki insho);

umumjismoniy tayyorgarlik darajasini baholash;

chet tillarini o‘zlashtirganlik darajasini baholash.

“Ekspert-kriminalistika faoliyati” yo‘nalishiga hujjat topshirganlar quyidagi sinovlarni topshiradi:

umumjismoniy tayyorgarlik darajasini baholash;

matematika fanini o‘zlashtirganlik darajasini baholash;

kimyo va fizika fanlarini o‘zlashtirganlik darajasini baholash.

“Raqamli texnologiyalar sohasida jinoyatlarga qarshi kurashish faoliyati” yo‘nalishiga hujjat topshirganlar quyidagi sinovlarni topshiradi:

matematika fanini o‘zlashtirganlik darajasini baholash;

informatika va axborot texnologiyalari fanini o‘zlashtirganlik darajasini baholash.

Maxsus kasbiy tanlovda to‘planishi mumkin bo‘lgan eng yuqori ballning 50 foizidan ko‘p ball to‘plagan abituriyentlar yakka tartibdagi yakuniy suhbatga qo‘yiladi.

Shu o‘rinda, sinovlarni o‘tkazish va baholash tartibi haqida ham kerakli ma’lumotlarni bilish foydadan xoli bo‘lmaydi.

Yozma ish bayon yoki insho yozishdan iborat. Bayon uchun 80 daqiqa, insho uchun 120 daqiqa ajratilib, 30 ballik tizimda baholanadi.

Umumjismoniy tayyorgarlik darajasini baholash o‘g‘il bolalar uchun turnikda tortilish, 100 va 3000 metrga yugurish, qizlar uchun esa kuch ishlatish mashqlari kompleksi, 100 va 1000 metrga yugurishdan iborat bo‘lib, 30 ballik tizimda baholanadi.

Chet tillarini o‘zlashtirganlik darajasi test sinovlari yoki nazariy imtihon orqali baholanadi. Ingliz, nemis va fransuz tillarini biladigan abiturientlar uchun test sinovlari, boshqa chet tilini biladiganlar uchun esa nazariy imtihonlai o‘tkazilib, 30 ballik tizimda baholanadi.

Matematika fanini o‘zlashtirganlik darajasi test sinovi orqali 30 ballik tizimda baholanadi.

Kimyo va fizika fanlarini o‘zlashtirganlik darajasini baholash biletdagi savollarga og‘zaki javob berish orqali 30 ballik (har bir fanga 15 ball) tizimda baholanadi.

Informatika va axborot texnologiyalari fanini o‘zlashtirganlik darajasini baholash biletdagi savolga og‘zaki javob berish va amaliy topshiriqlarni bajarish orqali 60 ballik (nazariy savolga – 20 ball; 1-amaliy topshiriqqa – 20 ball; 2-amaliy topshiriqqa – 20 ball) tizimda baholanadi.

Yakka tartibdagi yakuniy suhbat biletdagi 3 ta savolga og‘zaki javob berish orqali (huquqshunoslik faniga – 55 ball, O‘zbekiston tarixi faniga – 30 ball, tarbiya faniga – 25 ball) baholanadi.

Abituriyentlar uchun imtiyozlar ham mavjud.

1. Bilim va malakalarni baholash agentligi tomonidan beriladigan chet tilini bilish darajasi to‘g‘risidagi sertifikat yoki xalqaro sertifikatning B2 darajaciga ega bo‘lganlarga chet tili fanidan imtihonsiz belgilangan maksimal ball beriladi.

2. Bilim va malakalarni baholash agentligi tomonidan beriladigan umumta’lim fanlari (matematika, fizika va kimyo)ni bilish darajasini aniqlash bo‘yicha milliy sertifikatlar yoki xalqaro tan olingan sertifikatlarning tegishli darajalariga ega bo‘lganlarga matematika, fizika yoki kimyo fanidan o‘tkaziladigan sinovlarda quyidagicha ball beriladi:

A+, A darajali milliy sertifikatga yoki A-LEVEL imtihonining B, A, A* darajali xalqaro sertifikatga ega bo‘lganlarga – matematika, fizika yoki kimyo fanidan belgilangan maksimal ball;

B+, B, C+, C darajali milliy sertifikatga ega bo‘lganlarga – mos ravishda sertifikatdagi umumiy ballga nisbatan foiz asosida matematika, fizika yoki kimyo fanidan belgilangan maksimal ballga nisbatan tabaqalashtirilgan (proporsional) ball.

Bunda 2024-yil 1-martga qadar umumta’lim fanlari bo‘yicha berilgan milliy sertifikatlar uchun mazkur sertifikat olingan paytda amalda bo‘lgan imtiyoz tatbiq etiladi.

3. Professional darajadagi nufuzli xalqaro IT-sertifikatga ega bo‘lgan “Raqamli texnologiyalar sohasida jinoyatlarga qarshi kurashish faoliyati” ta’lim yo‘nalishiga hujjat topshirganlarga matematika, informatika va axborot texnologiyalari fanlari bo‘yicha to‘planishi mumkin bo‘lgan eng yuqori ballning 30 foizi miqdorida qo‘shimcha ball beriladi.

Shuningdek, maxsus kasbiy tanlov va yakka tartibdagi yakuniy suhbat natijalariga ko‘ra eng yuqori ball to‘plagan 5 nafar abituriyent mazkur yo‘nalishning ikkinchi kursiga to‘g‘ridan-to‘g‘ri qabul qilinadi.

Izoh: “Raqamli texnologiyalar sohasida jinoyatlarga qarshi kurashish faoliyati” ta’lim yo‘nalishiga o‘qishga kirish uchun imtiyozlar beradigan professional darajadagi nufuzli xalqaro IT-sertifikatlar ro‘yxati va darajalari ichki ishlar vaziri tomonidan belgilanadi.

4. “Vatan tayanchi” harakatining tegishli tavsiyanomalariga ega bo‘lganlarga yakka tartibdagi yakuniy suhbat natijalariga ko‘ra to‘plagan ballarining 5 foizi miqdorida qo‘shimcha ball beriladi.

5. “Temurbeklar maktabi” akademik litseylari bitiruvchilariga yakka tartibdagi yakuniy suhbatda o‘zlari to‘plagan ballarning 30 foizi miqdorida qo‘shimcha ball beriladi.

Eslatib o‘tamiz: o‘qishga kirmoqchi bo‘lgan abituriyentlarning arizalari qabul yilidan oldingi yilning 15-noyabridan qabul yilining 15-fevraliga qadar davom etadi.

Dastlabki tanlov tadbirlari qabul yilidan oldingi yilning 15 noyabridan qabul yilining 1-aprelga qadar o‘tkazilsa, maxsus kasbiy tanlov va yakka tartibdagi yakuniy suhbat qabul yilining iyun–iyul oylarida bo‘lib o‘tadi.

Nomzodlar maxsus kasbiy tanlov va yakka tartibdagi yakuniy suhbat natijalari asosida o‘qishga qabul qilinadi.

Hurmatli abituriyentlar! Imkoniyatingiz o‘z qo‘lingizda, maqsadni to‘g‘ri oling va kelajagingiz sari dadil qadam tashlang.

IIV akademiyasi