Ички ишлар органларининг халқчил фаолияти барча бўғиндаги раҳбарларнинг юксак салоҳияти ва бошқарув маҳоратига боғлиқ. Академия магистратурасида ўқув жараёни бевосита ана шу мақсадга қаратилган.

Магистратурада замонавий таълимнинг модулли тизими кенг жорий қилинган бўлиб, машғулотлар илғор педагогик ёндашувлар асосида олиб борилади. Ҳар бир ўқув модули якунида эса тингловчиларнинг назарий билимларини амалий кўникмалар орқали мустаҳкамлаш мақсадида илмий-малакавий амалиёт ташкил қилинади.

Ўқитишнинг бундай ёндашуви ижобий самара бераётгани яқинда ташкил этилган амалиёт даврида ҳам намоён бўлди. Тасдиқланган жадвалга асосан, “ташкилий-стратегик бошқарув” мутахассислиги тингловчилари “Ички ишлар органларининг тергов фаолиятини бошқариш”, “ташкилий-тактик бошқарув” мутахассислиги тингловчилари эса “ички ишлар органларининг кадрлар билан ишлаш фаолиятини ташкил этиш” ўқув модуллари бўйича амалий кўникмаларини мустаҳкамладилар.

Машғулотлар Ички ишлар вазирлигининг тегишли соҳавий хизматлари, Республика суд экспертизаси маркази, Тошкент шаҳар ва Тошкент вилояти Ички ишлар бош бошқармалари, шунингдек вазирлик тасарруфидаги таълим муассасалари, Бўстонлиқ тумани ва Ангрен шаҳар ички ишлар бўлимлари ҳамда Ўзбекистон миллий кутубхонасида ўтказилди. Мутахассисларнинг таъкидлашича, илмий ва малакавий амалиёт тизим фаолиятини таҳлил этган ҳолда бошқарувга хос кўникмаларни шакллантиришда муҳим аҳамият касб этмоқда.

ИИВ Академияси Ахборот хизмати