ИИВ академияси бошлиғи кундузги таълим 1-ўқув курсига қабул қилинган курсантлар билан мулоқот қилди.

Учрашувда мамлакатимиз ҳаётида рўй бераётган кенг кўламли ислоҳотлар, ички ишлар органлари тизимидаги ижобий ўзгаришлар, соҳа учун билим ва салоҳиятли кадрлар тайёрлаш йўлида амалга оширилаётган янгиланишлар, курсантларнинг замон талаблари даражасида таълим олиши учун яратиб берилаётган улкан имкониятлар ҳақида сўз борди.

Кейинги йилларда академияда таълим жараёнлари тубдан ислоҳ қилингани, курсантларнинг назарий билимини амалий кўникмалар орқали мустаҳкамлаш мақсадида дуал тизимда ўқитиш, ҳудудий ички ишлар органлари билан ҳамкорликда маҳорат дарсларини ташкил этиш, машғулотларга хорижий мутахассисларни жалб қилиш ва бошқа янгиликлар кенг жорий этилгани қайд этилди.

Ўқув даргоҳи раҳбари Янги Ўзбекистоннинг бугуни ва эртанги куни юксак билимли ёшлар қўлида эканлигини, катта ҳаётга кириб келаётган ёш авлод вакиллари ана шу масъулият ва ишончни доимо ҳис қилган ҳолда мамлакатимизнинг фидойи кадрлари бўлиши кераклигини таъкидлади.

– Академияда ўқиш ҳар бир йигит-қиздан билим, шижоат, ватанпарварлик ва мардликни талаб қилади. Сизлар Янги Ўзбекистоннинг истиқболи порлоқ ёшлари сифатида она Ватанимиз ва халқимизга садоқат билан хизмат қилишдек шарафли касбни танлагансиз. Ўқиш давомида касбий билим ва амалий кўникмаларни пухта эгаллаб, чинакам халқпарвар ички ишлар органи ходими бўлиб шаклланишингиз зарур, – деди академия бошлиғи Рустам Хатамов.

Тадбирда ёшларга зарур тавсиялар берилди. Ўқув ва хизмат интизомига қатъий риоя қилиш ҳар бир курсант фаолиятининг кундалик мезонига айланиши кераклиги айтиб ўтилди.

ИИВ академияси Ахборот хизмати