Ёшлик – улкан орзулар, дадил интилишлар ва юксак марралар сари одимлаш даври. Навқирон авлоднинг ана шу шижоатини қўллаб-қувватлаш, истеъдодини юзага чиқариш ва келажакка бўлган ишончини мустаҳкамлаш ИИВ академиясида олиб борилаётган таълим-тарбия жараёнининг муҳим йўналишларидан биридир.
Ёшлар куни муносабати билан ташкил этилган “Раҳбар ва ёшлар” учрашувида таълим маскани бошлиғи, полковник Рустам Хатамов бир гуруҳ иқтидорли курсантлар билан мулоқот қилди.
Учрашувда мамлакатимизда ёшларга қаратилаётган юксак эътибор, уларнинг билим ва салоҳиятини рўёбга чиқариш йўлида амалга оширилаётган ислоҳотлар хусусида сўз борди. Академия раҳбари бугунги янгиланишлар жараёнида ёшларнинг фаоллиги, ташаббускорлиги ва юрт тақдирига дахлдорлик ҳисси алоҳида аҳамият касб этишини таъкидлади.
– Муҳтарам Президентимиз ташаббуси билан амалга оширилаётган кенг кўламли ислоҳотлар ёшларнинг таълим олиши, ўз қобилиятини намоён этиши ва жамиятда муносиб ўрин эгаллаши учун янги имкониятлар яратмоқда. Айниқса, ички ишлар органларини замонавий фикрлайдиган, касбига садоқатли ва юксак малакали кадрлар билан таъминлашга катта эътибор қаратилмоқда. Сизлар ана шу ишончни чуқур ҳис этиб, келгуси хизмат фаолиятингизга ҳозирдан пухта тайёргарлик кўришингиз зарур. Зеро, ислоҳотларнинг амалий натижаси кўп жиҳатдан сиз каби билимли ва изланувчан ёшларнинг саъй-ҳаракатларига боғлиқ, – деди полковник Рустам Хатамов.
Мулоқот давомида таълим муассасасида иқтидорли курсантларни ҳар томонлама қўллаб-қувватлаш, уларнинг илмий ва ижодий изланишларини рағбатлантириш, илғор ташаббусларини ҳаётга татбиқ этиш масалаларига ҳам эътибор қаратилди. Ёшларнинг интеллектуал салоҳиятини ошириш, хорижий тиллар ва замонавий технологияларни пухта эгаллаши учун мавжуд имкониятлардан самарали фойдаланиш зарурлиги қайд этилди.
Самимий руҳда кечган учрашувда курсантларнинг фикр-мулоҳазалари, таклифлари ва келгусидаги режалари тингланди. Уларнинг интилишларини қўллаб-қувватлаш, иқтидорини янада юксалтириш ва янги ютуқлар сари чорлаш бўйича вазифалар белгилаб олинди.
ИИВ академияси Ахборот хизмати
