ИИВ Тезкор-қидирув департаменти Гиёҳвандлик ва психотроп моддаларнинг ноқонуний айланишига қарши курашиш бошқармаси билан ҳамкорликда тадбир ўтказилди.

Унда бошқарма вакиллари, ИИВ академияси профессор-ўқитувчилари ҳамда “ҳуқуқбузарликлар профилактикаси ва пробация фаолияти”, “тезкор қидирув фаолияти”, “эксперт-криминалистика фаолияти” ихтисослик йўналишлари бўйича таълим олаётган курсантлар қатнашди.

Тадбирда департамент масъуллари сўзга чиқиб, гиёҳвандлик воситалари ва психотроп моддалар билан боғлиқ жиноятлар, уларга қарши курашиш борасида амалга оширилаётган кенг қамровли чора-тадбирлар, эришилаётган натижалар, бу борада Гиёҳвандлик ва наркожиноятларга қарши курашиш бўйича миллий стратегияда белгиланган устувор йўналишларга тўхталиб ўтди.

Бугунги кунда наркожиноятлар жамиятга катта таҳдид солаётгани, айниқса ёшларни гиёҳвандлик воситалари ва психотроп моддаларга жалб қилишда интернет қулай воситага айланиб бораётгани таъкидланиб, соҳага кириб келаётган ёш ходимлар ўз ихтисосликлари бўйича зарур билим ва амалий кўникмага эга бўлиши, жамиятда бу каби иллатларга барҳам бериш ички ишлар органларининг асосий вазифаларидан бири эканлиги қайд этилди.

Тадбир давомида наркожиноятларни аниқлаш ва фош этишда амалга ошириладиган чора-тадбирлар юзасидан курсантларга тавсиялар берилди.

ИИВ академияси Ахборот хизмати