ИИВ академиясида Инновatsiон таълим фондининг қурилишига тамал тоши қўйилди. Мазкур лойиҳа Хитой ҳукуматининг гранд маблағлари ҳисобига барпо этилмоқда.
Шу муносабат билан бўлиб ўтган тадбирда Хитой Халқ Республикасининг мамлакатимиздаги элчиси Юй Цзюнь, Ўзбекистон Республикаси ички ишлар вазири ўринбосари Даврон Назармуҳаммедов, ИИВ академияси бошлиғи Рустам Хатамов, шунингдек, “Beijing Construction Engineering Group” компанияси вакиллари ҳамда таълим муассасаси профессор-ўқитувчилари иштирок этди.
Тадбир аввалида Ўзбекистон ва Хитой муносабатлари ўзаро ишонч руҳида изчил ривожланиб бораётгани, сўнгги йилларда сиёсий, савдо-иқтисодий, маданий-гуманитар ва глобал хавфсизлик йўналишларидаги алоқалар кенг кўлам касб этиб, стратегик шериклик юксак даражага кўтарилгани эътироф этилди.
Тантанали тадбирда Хитойнинг мамлакатимиздаги элчиси Юй Цзюнь сўз олиб, мазкур лойиҳа икки давлат ўртасида жадал ривожланаётган ҳамкорлик алоқалари ва қулай инвестициявий муҳитнинг амалий натижасидан далолат беришини алоҳида таъкидлаб ўтди. Ўз навбатида, таълим соҳасидаги ҳамкорлик самараси ўлароқ барпо этилаётган мазкур иншоот қурилишига Хитой томонидан катта қизиқиш билдирилаётганини қайд этди.
– Бугунги кунда Ўзбекистон ва Хитойнинг турдош олий таълим муассасалари ўртасида самарали ҳамкорлик йўлга қўйилган. Икки томонлама келишувлар асосида амалга оширилаётган таълим дастурлари мамлакатимиз ички ишлар органлари учун малакали кадрлар тайёрлашда, ўзаро тажриба алмашинувини кенгайтиришда муҳим аҳамият касб этмоқда. Инновatsiон таълим фонди ҳам икки томонлама муносабатларни янада мустаҳкамлашга хизмат қилиши, шубҳасиз, – деди ички ишлар вазири ўринбосари Даврон Назармуҳаммедов.
Шундан сўнг томонлар кенг жамоатчилик вакиллари иштирокида иншоот қурилишига тамал тошини қўйдилар.
Айтиш жоизки, янги иншоот ўз ичига Симуляция ва модуляция маркази ҳамда автодромни қамраб олади. Хитойнинг “Beijing Construction Engineering Group” компанияси томонидан барпо этилаётган лойиҳа ишга туширилгач, мамлакатимиздаги ягона инновatsiон таълим мажмуасига айланади.
ИИВ академияси Ахборот хизмати
