ИИВ Академиясининг докторант ва мустақил изланувчилари TOEFL ITP (Test of English as a Foreign Language) халқаро сертифакатига эга бўлиш имтиҳон топширдилар.

Давлат тест маркази ҳамда АҚШнинг Educational Testing Service (ETS) ташкилоти билан ҳамкорликда ташкил этилган тадбирда 18 нафар талабгор қатнашди. Имтиҳон жараёнлари онлайн тарзда, халқаро ташкилотнинг Ўзбекистондаги координаторлари иштирокида, белгиланган талаб ва меъёрлар асосида ўтказилди.

Айтиш жоизки, TOEFL ITP имтиҳонлари халқаро миқёсда тан олинган бўлиб, ундан муваффақиятли ўтганларга Educational Testing Service ташкилотининг сертификати берилади. Мазкур тест синовининг ўзига хос жиҳати шундаки, талабгор тест синови якунланиши билан ўз натижасини билиб олади.

Республика Олий таълим, фан ва инновациялар вазирлигининг 2023 йил 23 мартдаги буйруғига биноан, TOEFL ITP олий таълим муассасаларининг магистратура мутахассисликлари ҳамда олий таълимдан кейинги таълим ихтисосликларига ҳужжат топширишда талаб этиладиган хорижий тилларни билиш даражасини баҳоловчи сертификатлар рўйхатига киритилган.

ИИВ Академияси Ахборот хизмати