ИИВ академиясида оталиққа олинган таълим муассасалари ёшлари учун “Очиқ эшиклар куни” ташкил қилинди.

Пойтахтимиздаги 206-сонли умумтаълим мактаби ҳамда Янгийўл туманидаги 1-сонли ихтисослашган давлат умумтаълим мактаби ўқувчилари галдаги тадбир иштирокчилари бўлди.

Танишув жараёнида ёшлар академиянинг бошқа ўқув муассасаларидан фарқли жиҳатлари, масканда яратилган замонавий шароитлар, кундузги таълимдаги мутахассисликлар, курсантлар билан олиб борилаётган назарий ва амалий машғулотлар ҳақида кенг тасаввур ҳосил қилишди.

Бой китоблар фондига эга ахборот-ресурс маркази, спорт комплексидаги қулайликлар, ватанпарварликни тарғиб қилувчи бурчаклар, саф майдонида машғулот ўтаётган курсантлар ўқувчиларда ёрқин таассурот қолдирди.

Маънавият ва маърифат масканида ўтказилган мулоқот чоғида академия фаолиятига оид видеоролик намойиш қилиниб, ўқишга кириш истагидаги ёшлар учун тавсиялар берилди. Учрашув якунида тенгдошларига ҳар томонлама ўрнак бўлаётган ўқувчилар ва уларнинг устозлари академия бошлиғи номидан миннатдорлик хати ҳамда ташаккурнома билан рағбатлантирилди.

ИИВ академияси Ахборот хизмати