ИИВ Ўқув-дала марказида бўлиб ўтган мулоқот курсантларни фидоий, интилувчан ва ташаббускор бўлишга ундади.

Учрашувда муҳтарам Президентимиз ташаббуси билан юртимиз ёшлари учун яратиб берилаётган улкан имкониятлар, айниқса таълим тизимига татбиқ қилинаётган замонавий ёндашувлар ҳақида сўз борди. Академия бошлиғининг маслаҳатчиси, полковник Исмоил Ҳимматов курсантларга мурожаат қилар экан, Янги Ўзбекистоннинг эртанги истиқболи катта орзу-умидлар билан ҳаётга кириб келаётган ёшлар зиммасига улкан масъулият юклашини алоҳида таъкидлади.

Қизғин руҳда ўтган тадбирда Академия фаолиятини тубдан ислоҳ этишга қаратилган кенг кўламли ишлар, таълим масканида тингловчи-курсантлар учун яратилган шарт-шароитлар, соҳа учун профессионал кадрлар тайёрлашнинг ўзига хос жиҳатлари ҳақида маълумот берилди.

Шу куни Академия вакиллари ўқув-дала марказида касбий тайёргарликдан ўтаётган курсантларнинг яшаш ва дам олиши шароитларини ҳам кўздан кечиришди. Фаол ёшларни муносиб қўллаб-қувватлаш, курсантларнинг танлаган касбига садоқатини юксалтириш, иқтидор ва салоҳиятини тўлиқ рўёбга чиқариш учун барча имкониятларни яратиб бериш юзасидан чора-тадбирлар белгилаб олинди.

ИИВ Академияси Ахборот хизмати