ИИВ академиясининг магистратура тингловчилари учун профилактик аҳамиятга эга тадбир ўтказилди.

Шахсий хавфсизлик бош бошқармасининг Таълим муассасалари бўйича бўлими ташаббуси билан ташкил қилинган тадбирда коррупция ва унинг аянчли оқибатлари хусусида сўз борди.

Коррупция мамлакат тараққиётига тўсиқ бўлувчи, жамиятда адолатсизликнинг авж олишига олиб келувчи иллат эканлиги, коррупциявий омиллар туфайли фуқароларнинг давлат органларига бўлган ишончи йўқолиб, ҳуқуқий механизмлар издан чиқиши таъкидланди.

Кейинги йилларда коррупцияга қарши курашиш барча соҳаларда энг устувор вазифа этиб белгилангани, бу борада ички ишлар органлари тизимида ҳам изчил чора-тадбирлар амалга ошириб келинаётгани, бироқ айрим нопок ходимлар томонидан тамагирлик, мансабни суиистеъмол қилиш ва бошқа шу каби жиноятлар содир қилинаётгани, уларга нисбатан кескин чоралар кўрилаётгани айтиб ўтилди.

Тадбирда коррупция билан боғлиқ айрим ҳолатлар келтирилиб, тингловчиларга қатъий талаблар етказилди. “Жамоада соғлом муҳитни қарор топтириш раҳбарларга боғлиқ. Эртага қаерда, қандай лавозимда ишламанг, коррупцияга йўл қўймаслигингиз, маънавий фазилатларингиз билан шахсий таркибга намуна бўлишингиз шарт”, – деди ШХББ бўлим бошлиғи Ўткирбек Қосимов.

Шу куни “Нафснинг сўнгги манзили” номли видеоролик намойиш этилди.

ИИВ академияси Ахборот хизмати