Ички ишлар вазирлиги академиясида бўлиб ўтган байрамона тадбирда мустақиллик туфайли эришган ютуқларимиз, Янги Ўзбекистонни барпо этиш йўлидаги ислоҳотлар эътироф этилди.

Тадбир аввалида академия бошлиғи Рустам Хатамов сўз олиб, жамоани истиқлол айёми ва ўқув даргоҳи ташкил топганининг ўттиз йиллиги билан самимий қутлади. Мустақиллик халқимизга ўз эркини, миллий ўзлигини, инсоний қадр-қиммати ва ҳақ-ҳуқуқларини қайтариб бергани, истиқлол шарофати билан Ўзбекистон янги тарихий даврга қадам қўйгани таъкидлаб ўтилди. 

– Айниқса кейинги йилларда жамиятимиз ҳаётида мислсиз янгиланишлар рўй берди. “Инсон қадри учун” деган эзгу тамойил муҳтарам Президентимиз томонидан олиб борилаётган халқпарвар сиёсатнинг устувор мақсади этиб белгиланди. Бугун одамларимиз онгида янгича дунёқараш, атрофимизда бўлаётган ўзгаришларга дахлдорлик ҳисси, эртанги кунга ишонч ортиб бормоқда, – деди академия бошлиғи.

Айтиш жоизки, бу йилги истиқлол айёми академияда ўзгача шукуҳ ва кўтаринки руҳда нишонланди. Жамоа аъзолари ўқув даргоҳининг шонли юбилейини ўзига хос ютуқлар билан қарши олдилар. Тадбирда ислоҳотлар даврида эришилган юксалишлар ҳам тилга олинди. Шарафли йўлни босиб ўтган маскан бугунга келиб илғор тажрибаларни ўзида мужассам этган таълим даргоҳига айлангани эътироф этилди.

– Бугун шиддатли ҳаётнинг ўзи барчамизни янги марралар сари даъват этмоқда. Давлатимиз раҳбари Янги Ўзбекистонни барпо этишнинг устувор йўналишларидан бири сифатида таълим соҳасига эътибор қаратдилар. Академиямиз жамоаси олдида ҳам Ватанимиз ва халқимизга юксак садоқат билан хизмат қиладиган кадрларни тайёрлаш вазифаси турибди. Ишонаманки, барчамиз бир бўлиб, билим ва тажрибамизни ишга солиб, бундан ҳам юксак марраларга эришамиз, – деди академия бошлиғи.

Тадбирда Ўзбекистон Республикаси давлат мустақиллигининг ўттиз уч йиллиги ва академия ташкил этилганлигининг ўттиз йиллиги муносабати билан бир гуруҳ ходимлар Ички ишлар вазирлигининг идоравий мукофотлари ҳамда академия бошлиғининг эсдалик совғалари билан тантанали равишда тақдирланди.

Бадиий ҳаваскорлик жамоаларининг она Ватанимизни тараннум этувчи куй-қўшиқлари барчага байрамона кайфият улашди.

ИИВ академияси Ахборот хизмати