ИИВ Академиясида айни долзарб мавзудаги анжуман бўлиб ўтди. Фуқаровий-ҳуқуқий фанлар кафедраси ташаббуси билан ўтказилган анжуманда ҳуқуқшунос олимлар, илмий тадқиқотчилар, таълим муассасаси профессор-ўқитувчилари ва курсантлари қатнашди.

 Анжуманда ушбу соҳадаги ислоҳотлар, хусусан, давлатимиз раҳбарининг 2019 йил 5 апрелдаги “Ўзбекистон Республикасининг фуқаролик қонунчилигини такомиллаштириш чора-тадбирлари тўғрисида”ги фармойишининг асосий устувор йўналишлари таъкидлаб ўтилди. 

Сўзга чиққанлар “Фуқаролик кодексини такомиллаштириш ва ривожлантиришнинг асосий йўналишлари”, “Виртуал мулкнинг фуқаролик-ҳуқуқий ҳолати”, “Кўчмас мулк объектларини давлат рўйхатидан ўтказиш билан боғлиқ фуқаролик-ҳуқуқий муносабатлар”, “Ички ишлар органлари томонидан ҳақ эвазига кўрсатиладиган хизматларни фуқаролик-ҳуқуқий тартибга солиш масалалари” мавзуларида маъруза қилдилар. Фуқаролик қонунчилигини такомиллаштиришга оид таклиф ва тавсиялар келгусида ушбу соҳанинг ҳуқуқий асосларини мустаҳкамлашга хизмат қилиши айтиб ўтилди.

ИИВ Академияси Ахборот хизмати