Собиқ Тошкент олий милиция мактаби битирувчилари ёшлик чоғларини эсга олиш учун Ички ишлар вазирлиги академиясига келишди.

“Биз ўқиган 1970-74 йиллари олий мактаб учун янги бинолар қурилаётган эди. Назарий ва амалий машғулотлар Ўрда даҳасида жойлашган бинода ўтказиларди. Дасрдан сўнг автобусларда колонна бўлиб мактабимиз ётоқхонасига қайтардик. Қарангки, ушбу даргоҳни битирганимизга ҳам эллик йил бўлибди”, - дейди ички ишлар органи фахрийси Исматилло Якубов.

Собиқ битирувчилар академиянинг янги қиёфаси, кўркам ўқув биноларини кўздан кечириб, тингловчи ва курсантлар учун яратилган замонавий шароитлар билан бирма-бир танишдилар. Ёшлик онларини ёдга олиб, таълим-тарбия берган устозлари ва марҳум сафдошларини хотирладилар.

Тадбир сўнггида меҳмонларга академиядаги янгиланишларга оид видеоролик намойиш этилди.

ИИВ академияси Ахборот хизмати