Интеллектуал ўйин пойтахтимиздаги “Заковат арена”да Ички ишлар ходимлари куни муносабати билан уюштирилди.

Ёшлар ишлари агентлиги ва Ёшлар иттифоқи Тошкент шаҳар ҳудудий кенгаши билан ҳамкорликда ташкил қилинган беллашувда Ички ишлар вазирлиги академиясида таълим олаётган курсантлардан иборат 103 та жамоа қатнашди.

Тадбир аввалида “Заковат” интеллектуал клуби президенти Абдурасул Абдуллаев сўзга чиқиб, жамоаларни қизғин қутлади. Юртимизда китобхонликни оммалаштириш, илм-маърифатли ёшлар сафини кенгайтириш мақсадида ташкил қилинган лойида нафақат мамлакатимиз, балки қўшни давлатларда ҳам оммалашиб бораётганини эътироф этди.

Билим, тафаккур ва интеллектуал салоҳиятни тоблаган ўйин давомида иштирокчиларга 24 та савол йўлланди. Жамоалар ҳар бир саволга аниқ ва тўғри жавоб беришга, мусобақа ғолиби бўлишга интилдилар.

Қизиқарли баҳсларга бой ўтган ўйин якунида 3-босқич курсантларининг “Иқтидорли юристлар” жамоаси энг кўп очко тўплаб, академия бошлиғи кубоги, диплом, “Билимдон” стол ўйини ҳамда эсладик совға билан тақдирланди. Шунингдек, энг фаол жамоалар ва курсантлар тадбир ташкилотчилари томонидан муносиб рағбатлантирилди.

ИИВ академияси Ахборот хизмати