Бош қомусимиз қабул қилинганининг ўттиз йиллиги муносабати билан Тошкент давлат транспорт университетида “Конституция билимдони” интеллектуал танлови бўлиб ўтди.

Танловда Тошкент давлат юридик университети, Жаҳон иқтисодиёти ва дипломатия университети, Тошкент давлат аграр университети, Ички ишлар вазирлиги академияси ҳамда мезбон университетда таълим олаётган талаба ва курсантлар иштирок этди.

Иштирокчилар “Таништирув”, “Бошқотирма”, “Саҳна кўриниши”, “Дебат” шартлари бўйича ўзаро беллашди. Муросасиз ва қизғин мунозараларга бой ўтган танлов якунида ИИВ Академиясининг “Қомусимиз қалқонлари” жамоаси фахрли биринчи ўринни эгаллади. Жаҳон иқтисодиёти ва дипломатия университетининг “Адолат пойдевори” жамоаси иккинчи, Тошкент давлат аграр университетининг “Юриспруденсия” жамоаси эса учинчи ўринга сазовор бўлди.

Ғолиб ва совриндорларни тақдирлаш маросимида Тошкент давлат транспорт университети ректори Одил Абдураҳмонов иштирок этди.

ИИВ Академияси Ахборот хизмати