E'lonlar | mvd

E’lonlar

Inson huquqlari umumjahon deklaratsiyasining 70 yilligi, O‘zbekiston Respublikasi Konstitutsiyasining 26 yilligi hamda 9 dekabr – Xalqaro korrupsiyaga qarshi kurash kuniga bag‘ishlab O‘zbekiston Respublikasi Ichki ishlar vazirligi Akademiyasi axborotnomasining Maxsus soni nashr etilishi belgilandi.

Shu munosabat bilan O‘zbekiston Respublikasi Ichki ishlar vazirligi Akademiyasi axborotnomasi tahririyati quyida ko‘rsatilgan ruknlardagi ilmiy maqolalarni qabul qiladi.

1) Inson huquqlari umumjahon deklaratsiyasiga 70 yil;

2) O‘zbekiston Respublikasi Konstitutsiyasi – erkin va farovon hayotimiz asosi;

3) Korrupsiyaga qarshi kurash – ustuvor vazifa.

Tahririyatga topshiriladigan maqolalar quyidagi talablarga javob berishi lozim:

– Maqolada belgilangan mavzuning umumnazariy, ijtimoiy-siyosiy, huquqiy va amaliy masalalari hamda mazkur sohalarda amalga oshirilgan ishlarning tizimli tahlili, yangi nazariy va amaliy xulosalar, taklif va tavsiyalar aks etishi;

muammoning qo‘yilishi, materialning nazariy-metodologik jihatdan puxtaligi, unda keltirilayotgan ma’lumotlarning ishonchli va to‘g‘riligi, muammo, xulosa, taklif va tavsiyalarning asosli bo‘lishi;

ilmiy bahs-munozara, foydalanilgan manbalarga iqtiboslar (havolalar) mavjud bo‘lishi;

fikrlar mantiqan izchil, aniq va lo‘nda bayon qilinishi;

ochiq matbuotda e’lon qilinishi mumkin bo‘lmagan ma’lumotlar bo‘lmasligi;

maqola matnining hajmi 10–12 betdan oshmasligi, kompyuterda MS WORD dasturining «Times New Roman» shriftida, 14 shriftda, 1,5 interval va A4 shakldagi qog‘ozning bir tomonida yozilishi, matnning to‘rt tomonidan kamida 20 mm dan hoshiya qoldirilishi kerak.

– Maqolaning birinchi sahifasida quyidagi ma’lumotlar bo‘lishi lozim:

– muallif(lar)ning ismi, familiyasi va otasining ismi (to‘liq), ish joyi va lavozimi, ilmiy darajasi va unvoni, faxrli unvonlari, telefon raqami, elektron manzili;

– o‘zbek, ingliz va rus tillarida qisqacha annotatsiya, tayanch so‘zlar;

– maqoladagi ma’lumotlarning mazmuni va keltirilgan faktlarning haqiqiyligini tasdiqlovchi muallif imzosi.

– Muallif o‘z maqolasining qo‘lyozmasini tegishli hujjatlari (soha mutaxassisining taqrizi, elektron varianti) bilan birga tahririyatga topshiradi. Maqolalar Tahririyat-noshirlik bo‘limida qabul qilinadi.

O‘zbekiston Respublikasi Ichki ishlar

vazirligi Akademiyasi axborotnomasi tahririyati